لتحضير البسبوسة منحتاج:
كيلو سميد
كوب سكر
كوب حليب سائل
كوب زيت نباتي
نص ملعقة صغيرة مسكة
٤ ملاعق صغار بايكينغ باودر
٦ ملاعق صغيرة ما زهر
قطر
لوز مقطع بالنص
يلا نحضرها:
منبدا بتحماية الفرن.
بوعاء كبير منوضع السميد، السكر، المسكة، البايكنغ باودر، الحليب، الزيت والمازهر.
منخلطن بشكل جيد ليصير عنا عجينة طرية ومتماسكة بهالشكل.
مندهن صينية بالزبدة من كل الجوانب، ومنرش عليها شوية دقيق. منتخلص من الدقيق الزايد على وعاء.
منسكب العجينة بالصينية ومنفردها بالمعلقة بهالطريقة، منرجع منرصها بإيدنا بشكل جيد لتصير العجينة متساوية.
بسكين منقطع العجينة لمربعات مايلة.
منوزع حبة لوز بنص كل مربع ومنضغط شوي على الحبة لتدخل بالعجين.
مندخل الصينية على الفرن الحامي لمدة ٣٠ دقيقة تقريبًا.
لما تستوي ويصير لونها دهبي، منطلع الصينية من الفرن وفورًا منسكب عليها القطر هي وساخنة. منتركها لتبرد وتتشرب القطر.
منقطعها ومنقدمها باردة.
حضري البسبوسة قبل بوقت وحفظيها بالفريزر بدون خبز. عند الحاجة، خبزيها وقدميها.